ವಜ್ರಮಾಲೆ
ಎಳೆ ಮುಂಜಾವಿನ ಹಸಿರೆಲೆಯಲಿ
ವಜ್ರಗಳ ಪೋಣಿಸಿದ ಸರಮಾಲೆ
ಫಳ ಫಳನೆ ಹೊಳೆಯುತಿದೆ
ಇದು ಸೃಷ್ಟಿಯ ಕೆಲಸವೇ ಇರಬೇಕು...
ಬಂಗಾರದ ಬೆಲೆಯು ಶಿಖರಕ್ಕೆ ಏರಿಹುದು
ಇಂತಹದರಲೂ ಹೊಳೆವ ರತ್ನಗಳ
ಪೋಣಿಸಿ ಮೈತುಂಬ ಅಲಂಕರಿಸಿಹೆ
ನಿನ್ನ ಸಿರಿವಂತಿಕೆಗೆ ಸಾಟಿ ಯಾರೇ..??
ಬಂಗಾರದೆಲೆಗೆ ವಜ್ರಗಳ ಮಾಲೆ
ಮದುವೆ ಹೆಣ್ಣಿಗೆ ಮಗ್ಗಿನ ಜಡೆ
ಎಂಬಂತೆ ಹೊಸ ತನದಿ ಕಾಣುತಿಹಳು
ಈ ಬೆಳ್ಳಂ ಬೆಳಗಿನ ಇಬ್ಬನಿ
ಹನಿ ಹನಿಗಳು ಸೇರಿ ಸಾಲುಗಟ್ಟಿ
ಆ ಎಳೆದಿಂಡಿಗೆ ಭದ್ರಕೋಟೆ ಕಟ್ಟಿ
ಅತ್ತಿತ್ತ ಅಲುಗದೆ ಮಿಂಚುತಿರುವ
ಮುಂಜಾವಿನ ತುಷಾರ ಇವಳು...
No comments:
Post a Comment